Policia e Kosovës ka njoftuar se ka suspenduar një zyrtar policor në Gjakovë, nën dyshimin për rrjedhje të informatave zyrtare. Zyrtari i dyshuar është punonjës i Stacionit Policor në Gjakovë dhe ndaj tij është marrë masa e suspendimit për 72 orë.
Në njoftimin zyrtar thuhet se suspendimi është bërë pas veprimeve operativo-hetimore të ndërmarra nga Drejtoria Rajonale në Gjakovë, me qëllim të verifikimit të një informate të brendshme.
“Pas hetimeve të zhvilluara, është identifikuar një zyrtar policor, i cili dyshohet për rrjedhje të informatës zyrtare. I njëjti është suspenduar për 72 orë,” thuhet në komunikatën e Policisë së Kosovës.
Policia bën të ditur se do të ndërmerren të gjitha veprimet e nevojshme në bashkëpunim të ngushtë me institucionet përgjegjëse, përfshirë edhe Inspektoratin Policor të Kosovës.
“Policia e Republikës së Kosovës, përveç angazhimit në realizimin e objektivave strategjike, i kushton rëndësi të veçantë çështjeve që lidhen me integritetin, disiplinën dhe përgjegjësinë e zyrtarëve policorë,” theksohet më tej në njoftim.
Hetimet për këtë rast janë duke vazhduar dhe nuk janë dhënë më shumë detaje për identitetin e zyrtarit të suspenduar apo natyrën e informatës që dyshohet të jetë rrjedhur.