Policia e Kosovës ka njoftuar për arrestimin e një zyrtari të administratës lokale në Gjakovë, i cili dyshohet për veprën penale të “marrjes së ryshfetit”.
Sipas njoftimit, Njësia Rajonale për Hetimin e Krimeve Ekonomike dhe Korrupsionit ka zhvilluar hetime pas pranimit të informatave relevante, ndërsa në koordinim me Prokurorinë Themelore në Gjakovë dhe me urdhër të Gjykatës kompetente është zbatuar një masë e veçantë hetimore.
Gjatë operacionit janë siguruar prova materiale, përfshirë edhe paratë që ishin objekt i simulimit, të cilat janë sekuestruar.
I dyshuari është intervistuar në prani të avokatit mbrojtës, por ka vendosur të heshtë. Pas intervistimit, prokurori i shtetit ka lëshuar vendim për ndalim prej 48 orësh ndaj tij.