Në Forumin e sotëm të Dubrovnikut nga Kosova është duke marrë pjesë kryediplomatja Donika Gërvalla.
Ajo mori pjesë në një panel të drejtuar nga Sekretari i Shtetit të Kroacisë, Zdenko Luçiq dhe foli për sukseset e Kosovës në luftën për sundim të ligjit.
“Ministrja Gërvalla fillimisht e falënderoi Ministrin Gordan Grlić Radman dhe OECD-në për ftesën, duke theksuar se Kosova me popullsinë më të re në Evropë është shembulli më i mirë në rajon për luftën e suksesshme për sundimin e ligjit dhe besimin në drejtësi dhe qeverisje si bazë e domosdoshme për një zhvillim të qëndrueshëm të vendit dhe ulje graduale të numrit të atyre që perspektivën e shohin në emigrim”, thuhet në njoftimin e MPJD-së.
Gërvalla-Schwarz në këtë panel ishte bashkë me ministrin e Jashtëm të Bosnje e Hercegovinës, Elmedin Konakoviq, Nënsekretaren për çështje Zhvillimore dhe Ekonomike nga MPJ e Estonisë, Mariin Ratnik, si Ivana Živković – UNDP, Hrvoje Supić – Diaspora kroate dhe Soana Jaupllari – Profesoreshë e Tregtisë Ndërkombëtare dhe Migrimit nga Universiteti i Tiranës.
Ministri i Punëve të Jashtme të Republikës së Kroacisë, Gordan Grlić Radman hapi Forumin duke vënë në pah rëndësinë e bashkëpunimit dhe takimeve të tilla, por edhe rëndësinë e veçantë të diasporës për zhvillimet në Kroaci dhe rajon.
Delegacioni i Kosovës, pjesë e të cilit janë edhe Zëvendësministri i MPJD-së, Kreshnik Ahmeti dhe Ambasadori i Kosovës në Kroaci, Martin Berishaj, mori pjesë edhe në darkën e shtruar nga kryeministri i Kroacisë Plenkoviq për nder të Forumit dhe pjesëmarrësve të tij.