Trajneri aktual i Ballkanit, Ilir Daja ka parakaluar të gjithë emrat në garë dhe shihet si kandidati kryesor për selektor të Përfaqësueses së Kosovës.
Siç raporton portali Telegrafi të enjten, arritja e marrëveshjes mes FFK-së dhe Dajës mund të ndodhë së shpejti.
“Por trajneri i Ballkanit do të emërohej në detyrë vetëm pas përfundimit të sezonit 2023/24”, raporton Telegrafi.
Gjatë ditës së mërkurë, Federata e Futbollit e Kosovës vendosi t’i ndajë rrugët me përzgjedhësin slloven, Primoz Gliha, pas dështimit të Kosovës në eliminatoret e Euro 2024.
Menjëherë pas lajmit të largimit të Glihas, filluan të qarkullojnë lajme me emra të ndryshëm të trajnerëve që pritet ta marrin drejtimin e Kosovës.
Ndër më të përfolurit ishin kroati Nenad Graçan dhe boshnjaku Blazh Slishkoviç.
Ilir Daja njihet për suksesin e madh me Ballkanin e Suharekës. Në dy sezonet e fundit i ka shpallur suharekasit kampion të Kosovës dhe janë në rrugë për të fituar edhe vitin e tretë radhazi.
Përveç kësaj, trajneri nga Shqipëria ka arritur të kualifikojë Ballkanin në dy edicione radhazi në grupet e Ligës së Konferencës, teksa gjatë kohës së tij janë bërë edhe disa shitje të mëdha të lojtarëve vendor.
57-vjeçari i lindur në Tiranë ka drejtuar shumë klube të njohura në Shqipëri që nga viti 2005 si Elbasani, Dinamo Tirana, Besa e Kavajës, Tirana, Skënderbeu, Flamurtari dhe Partizani.
Në Shqipëri, Daja ka fituar titullin me tri herë me tri skuadra të ndryshme. Me Elbasanin në sezonin 2005/06, me Dinamon në sezonin 2007/08 dhe Skënderbeun në sezonin 2017/18, ku e fitoi edhe Kupën.