Pa u bërë 24 orë nga kërkesa e Policisë së Kosovës për bashkëpunim me qytetarët për identifikimin e një personi të dyshuar për kanosje në Prizren, i njëjti është identifikuar dhe ka përfunduar në prangat e Policisë. Gazeta raportoi ekskluzivisht se kush është i dyshuari, teksa tashmë janë zbuluar edhe detaje të tjera.
Burimet kanë bërë me dije se i arrestuari Etrit Çoçaj, po dyshohet se më 30 dhjetor, e ka kërcënuar bashkëshorten e Petrit Kryeziut, Prokuror në Departamentin e Përgjithshëm në Prokurorinë Themelore në Prizren.
Motivet e incidentit akoma nuk dihen, por që tashmë Policia në koordinim me Prokurorin e Shtetit kanë nisur hetimet për të zbardhur rrethanat e rastit.
Çoçaj është arrestuar dhe shoqëruar në stacion policor, ku është intervistuar nga hetuesit policorë, për veprën me të cilën ngarkohet.
Ndaj tij, prokurori ka urdhëruar masën e ndalimit policor, nën dyshimet për kryerjen e veprës penale “Kanosje” dhe ndërmarrjen e veprimeve të tjera brenda afatit ligjor.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.