Ramush Haradinaj, Kryetari i Aleancës për Ardhmërinë e Kosovës (AAK), i është kundërpërgjigjur eksponentëve të Lëvizjes Vetëvendosje – partisë ka pushtetin – posaçërisht Dejona Mihalit, që zyrtarisht mban pozitën e Koordinatores së Komiteteve të LVV-së, pas sulmeve të tyre në drejtim të ish-kryeministrit për çështjen e hapjes së Urës mbi lumin Ibër.
Përmes një postimi në Facebook, Haradinaj ka thënë se “nuk është hera e parë që kanë provuar të më pozicionojnë ‘këndej ose andej ure’, duke dashur të ma vendosin kufirin ne mes!”, duke iu kundërpërgjigjur kështu Mihalit, e cila, para disa ditësh, në një postim të gjatë e pyeti kreun e AAK-së “se nga cila anë e urës gjendesh”?
Ish-kryeministri ia rikujtoi se kanë provuar edhe Pejën “të ma ndajnë me lum, kanë provuar që të ndajnë Mitrovicën me lum, besa edhe krejt Kosovën duke i vendosur disa kufij të ri, në emër të njëfarë shkëmbimi territorial”.
“Por, as atëherë e as sot, s’kanë gjetur te unë aleat të ndarjes, e nuk do të gjejnë kurrë”, shkroi Haradinaj.
Albin Kurti, sipas kreut të AAK-së, “përmes sejmenëve të tij, ma paska bërë një pyetje publike se ‘nga cila anë e urës’ jam unë!”, duke theksuar se “pse u dashka që unë të jem në njërën anë të urës!”.
“Unë jam ku kam qenë gjithmonë, në çdo milimetër të territorit të Kosovës dhe se tek Ura e Ibrit nuk ka dy anë”, potencoi ai, derisa iu kundërpërgjigj pushtetit po me një pyetje.
“Po ju që po pyesni nga cila anë, a po sugjeroni që atë pjesë ta ndani në dysh, apo si e keni hallin?! Ose në cilën anë jeni ju, që ta marrim vesh njëherë e mirë!”, përfundoi./Telenews/