Presidenti amerikan, Donald Trump, ka kërcënuar Kinën me një tarifë shtesë prej 50% mbi mallrat e importuara në ShBA nëse nuk tërheq tarifën e saj kundërmasë prej 34%, ndërsa tregjet globale vazhdojnë të bien, shkruan BBC-ja.
Pekini u kundërpërgjigj të dielën, pas vendimit të javës së kaluar nga Trump për të vendosur një taksë prej 34% mbi importet kineze si pjesë e “Ditës së Çlirimit”, ku njashtu vendosi një taksë minimale prej 10% mbi pothuajse të gjithë partnerët tregtarë të Amerikës.
Në një postim në rrjetet sociale të hënën, Trump i dha Kinës afat deri të martën për të hequr kundërmasën e saj ose do të përballet me tarifën prej 50%.
Në përgjigje, ambasada kineze në SHBA akuzoi Uashingtonin për “bullizëm ekonomik” dhe tha se Pekini “do të mbrojë me vendosmëri të drejtat dhe interesat e tij legjitime”.
Nëse Trump vepron sipas kërcënimit të tij, kompanitë amerikane mund të përballen me një normë totale prej 104% mbi importet kineze – pasi kjo vjen mbi tarifat prej 20% të vendosura tashmë në mars dhe 34% të shpallura javën e kaluar. Ekziston frika se kjo mund të thellojë një luftë tregtare midis dy ekonomive më të mëdha dhe rivalëve globalë.