“Shiu është për bereqet”, kaq ka thënë kryeministri Kurti kur është pyetur për dështimin për herë të pestë të konsituimit të Kuvendit të Kosovës.
Kurti u pyet për këtë çështje derisa mori pjesë në përurimin e një ure në Rogovë të Hasit, shkruan gazeta online Reporteri.net.
“Ne ndërtojmë ura, banorët e Rogovës punojnë tokën e shiu është për bereqet”, tha shkurt Kurti para gazetarëve.
Legjislatura e nëntë e Kuvendit të Kosovës, e dalë nga zgjedhjet e 9 shkurtit, ende nuk ka arritur të konstituohet.
Një tentativë e pestë në këtë drejtim ka dështuar dje, ndërkohë që seanca pritet të vazhdojë nesër. Kjo do të jetë seanca e gjashtë çdo 48 orë, që nga 15 prilli.
Propozimi i Lëvizjes Vetëvendosje vazhdon të mbetet emri i Albulena Haxhiut. Në tri votime, ajo s’ka marrë votat e nevojshme. Nga 61 sa duhen, Haxhiun e kanë votuar vetëm 57 deputetë.
Partitë e tjera, PDK, LDK dhe AAK kanë kërkuar nga Vetëvendosje që të gjejnë një kandidat unifikues për këtë post, ngase siç kanë thënë ata emri i Albulena Hahxiut, për ta është i papranueshëm.