Policia e Kosovës ka hyrë sot në një objekt në Mitrovicën e Veriut, me kërkesë të Komunës së kësaj pjese, ku më parë ishin të vendosura tri institucione serbe: Institucioni për sport, rini dhe shërbime të specializuara, Lidhja Sportive dhe Shoqëria Kulturore-Artistike “Kosovski božur”.
Zëvendës komandanti i Policisë së Kosovës për rajonin e veriut, Veton Elshani, tha se policia ka vepruar sipas kërkesës së komunës, e cila e konsideron objektin pronë të saj.
“Zyrtarët komunalë kërkuan asistencën tonë për të hyrë në pronën që ata e konsiderojnë si të tyren. Ata hynë dhe më pas punonjësit e atyre institucioneve dolën nga hapësirat. Nuk pati asnjë problem,” deklaroi Elshani.