Bashkimi Evropian ka refuzuar kërkesën e Rusisë për të zhvilluar konsultime në Organizatën Botërore të Tregtisë (OBT) lidhur me mekanizmin e ri të taksës kufitare të karbonit, e cila prek eksportet me emetim të lartë karboni drejt BE-së.
Në një dokument të dorëzuar në OBT më 26 maj, BE-ja shpjegon arsyet e këtij refuzimi duke theksuar “luftën agresive” të Rusisë kundër Ukrainës, duke e konsideruar të pamundur arritjen e një zgjidhjeje reciprokisht të kënaqshme në kuadër të konsultimeve të propozuara.
Rusia kishte kërkuar këto bisedime si një hap paraprak për një ankesë formale në OBT, pasi e kundërshton fuqishëm vendosjen e taksës, që konsiderohet një pengesë për eksportet e saj me emetim të lartë të karbonit.
Pavarësisht kësaj, Bashkimi Evropian ka theksuar se në këtë moment nuk ka mundësi për progres konstruktiv me Moskën, për shkak të kontekstit të rënduar gjeopolitik.