Edhe pse prej kohësh mendohej se ChatGPT ishte një mjet i krijuar kryesisht për punë, analiza të reja tregojnë një tablo krejtësisht ndryshe.
Shumica e bisedave lidhen me detyra të zakonshme të përditshme, çka tregon se mjeti po shndërrohet gjithnjë e më shumë në një asistent universal të inteligjencës artificiale që e lehtëson jetën e përdoruesve.
Gjithnjë e më shumë njerëz po e përdorin ChatGPT-në si një shok digjital që ndihmon në planifikim, mësim, veshje, udhëtime dhe aktivitete kreative.
Një studim i madh, në bashkëpunim me Universitetin e Harvardit dhe atë të Duke, ka treguar se vetëm një e treta e pyetjeve lidhen me punën; shumica kanë të bëjnë me zakonet personale dhe vendimet e përditshme.
Kjo tregon se mjeti nuk shihet vetëm si një chatbot i zakonshëm, por si një mbështetje praktike që “përfshihet” kudo ku nevojitet. Nga zgjedhja e veshjeve, organizimi i ditës, deri te zgjidhja e bllokimeve krijuese, ChatGPT po bëhet partneri digjital që ndryshon rutinën tonë.
Bazuar në rastet e para të përdorimit, përdoruesit krijojnë zakone të reja, ku ChatGPT bëhet pjesë e ritmit të përditshëm. Kur duhet ulur stresi, marrë një vendim i shpejtë, organizuar një fundjavë apo kontrolluar një ide – ChatGPT është forma më e arritshme e ndihmës.
Mësimi i gjuhëve
ChatGPT mund të shërbejë si udhëzues personal për gjuhët: shpjegon rregulla të ndërlikuara, krijon lista fjalësh dhe edhe histori të shkurtra që ndihmojnë në mësim. Përdoruesit shpesh kërkojnë që ChatGPT të “luajë rolin” e bashkëbiseduesit, çka u jep më shumë vetëbesim para udhëtimeve ose provimeve.
Ditari interaktiv
Disa e përdorin si një ditar emocional: ChatGPT analizon emocionet dhe sjelljet, identifikon modele dhe u rikujton gjërat që ndikojnë te produktiviteti ose disponimi.
Partner krijues
Në rastet kur ka një bllokadë kreative – për një libër, vlog, fotografi apo ndonjë projekt tjetër – ChatGPT ndihmon me ide, sugjerime dhe motivim për të vazhduar.
Këshilltar stili
ChatGPT mund të veprojë si një “stilist” digjital: nëse i përshkruhet ngjarja, veshja dhe disponimi, ai sugjeron kombinime ngjyrash, veshjesh dhe aksesorësh.
Udhëzues udhëtimi
Gjatë planifikimit të një udhëtimi, ChatGPT mund të krijojë itinerarin ideal, të sugjerojë vende lokale, të ndihmojë në organizimin e vizitave dhe madje të mësojë fraza të dobishme në gjuhën vendore.