Platforma e mediave sociale X e Elon Musk-ut ka rënë dakord të ndryshojë sistemin e saj të verifikimit të përdoruesve në Bashkimin Evropian pas një gjobe prej 120 milionë eurosh vitin e kaluar , sipas një raporti që citoi zëdhënësin e Komisionit Evropian, Thomas Regnier.
Bloomberg raportoi se X kishte propozuar zgjidhje për shenjën blu të kontrollit, e cila përdoret për të verifikuar llogaritë.
Komisioni Evropian gjobiti X për shkelje të Aktit të Shërbimeve Digjitale në dhjetor, duke thënë se sistemi i verifikimit me pagesë, i prezantuar pasi Elon Musk bleu Twitter-in në vitin 2022, mund t’i mashtronte përdoruesit duke krijuar përshtypjen se llogaritë e verifikuara janë të besueshme.
Komisioni argumentoi gjithashtu se përdoruesit dhe autoritetet nuk mund të kenë qasje në një regjistër të përditësuar të reklamuesve në faqe, gjë që mund të jetë problematike edhe gjatë fushatave zgjedhore, pasi origjina e pretendimeve është e paqartë.