Qeveria e Republikës së Kosovës, ka zhvilluar sot mbledhje elektronike, në të cilën ka shqyrtuar dhe miratuar disa vendime.
Mes të tjerash, qeveria ka miratuar projektligjin për ratifikimin e marrëveshjes së kredisë ndërmjet Republikës së Kosovës, e përfaqësuar nga Ministria e Financave dhe Asociacionit Ndërkombëtar për Zhvillim për Projektin e Zhvillimit të Sektorit Financiar të Kosovës.
Po ashtu, qeveria miratoi projektligjet për ratifikimin e marrëveshjeve për programin e Kredisë së bazuar në politikat për sektorin e Energjisë dhe Klimës për Kosovën.
Gjatë mbledhjes, qeveria miratoi projektligjin për ratifikimin e marrëveshjes së kredisë ndërmjet Republikës së Kosovës, përfaqësuar nga Ministria e Financave dhe Asociacionit Ndërkombëtar për Zhvillim për Projektin “Lehtësimi i Tregtisë dhe Transportit në Ballkanin Perëndimor 2.0”.
Qeveria miratoi edhe listën e artikujve për përdorim të përbashkët, që janë objekt i procedurës qendrore të prokurimit publik.
Pas shqyrtimit, qeveria po ashtu miratoi ndryshimet në tabelën 3.2 të Ligjit nr. 10/L-001 për ndarjet buxhetore të buxhetit të Republikës së Kosovës për vitin 2026, me qëllim të përmbushjes së obligimeve financiare dhe kontraktuale të papërmbushura nga viti paraprak, për Ministrinë e Mbrojtjes.