Kryeministri Albin Kurti u ka bërë thirrje shqiptarëve të Bujanovcit që të dalin masivisht në votimet e përsëritura në një vendvotim për zgjedhjet parlamentare në Serbi.
Shefi i qeverisë u ka bërë thirrje qytetarëve për të votuar Shaip Kamberin, të cilit i duhen 650 vota nga 1089 votues shqiptarë të regjistruar në vendvotim.
Ai ka thënë se një përqindje e vogël mund të ndryshojë situatën në zgjedhjet parlamentare në Serbi.
“Një përqindje e vogël e votave mund të ndryshojë situatën dhe shqiptarët të mund të marrin një ulëse në Kuvendin e Serbisë. Pas vendimit për përsëritjen e zgjedhjeve në qendrën 6 të vendvotimit në Bujanoc, janë rritur gjasët që bartësi i listës së Koalicionit të Shqiptarëve të Luginës, z. Shaip Kamberi, të fitojë edhe një mandat deputeti”, tha Kurti.
“Potenciali votues i vendvotimit 6 është 1089 vota. Nevojiten 650 vota ose votimi i 60% të qytetarëve nga lista e votimit që z. Kamberi të vazhdojë përfaqësimin e shqiptarëve”, deklaroi kryeministri.
Kurti ka lavdëruar përfaqësimin e interesave shqiptare nga Kamberi në Parlamentin e Serbisë.
“Për dy mandate përfaqësimi z. Kamberi ka qenë gjithmonë i zëshëm gjatë seancave parlamentare në mbrojtje të të drejtave të shqiptarëve dhe në denoncimin e regjimit autokratik në Serbi”, tha kryeministri.