Ish-kryetarit të Kuvendit të Kosovës, Kadri Veseli i është vazhduar paraburgimi nga Gjykata Speciale në Hagë.
Këtë vendim, gjyqtari Nicollas Guillou e ka marrë gjatë ditës së sotme.
Sipas vendimit të gjyqtarit të procedurës në rastin e Kadri Veselit, thuhet se arsyet të cilat ish-kryeparlamentari mbahet në paraburgim, ende nuk kanë pushuar.
E për mbajtjen në paraburgim nuk është marrë parasysh garancia e ofruar nga Policia e Kosovës, se i përmbahet secilës masë të përcaktuar nga Dhomat e Specializuara.
Në arsyetim përmendet rreziku i ikjes, ndikimit në dëshimtarë, shkatërrimi i provave dhe pengimi i procedurave, si disa nga arsyet tjera që ky vendim mbetet valide.
Theksojmë se më 29 prill, Zyra e Prokurorit të Specializuar ka dorëzuar në Gjykatën Speciale një aktakuzë të re, të ndryshuar, ndaj ish-presidentit Hashim Thaçi, Kadri Veselit, Jakup Krasniqit si dhe ish-deputetit të Lëvizjes Vetëvendosje, Rexhep Selimi.
Në aktakuzën e re, prokurori Jack Smith ka përfshirë disa krime të pretenduara në Suharekë dhe Gjilan, për të cilat akuzohen ish-krerët politikë e ushtarakë të Ushtrisë Çlirimtare të Kosovës.
Ai së bashku me ish-krerët e Ushtrisë Çlirimtare të Kosovës, Hashim Thaçi, Rexhep Selimi dhe Jakup Krasniqi po akuzohen se mes marsit 1998 deri në shtator 1999 së bashku me anëtarë tjerë “kishin qëllimin e përbashkët për të siguruar si dhe ushtruar kontroll mbi gjithë Kosovën përmes metodave të frikësimit, keqatrajtimit, ushtrimit të dhunës dhe eliminimit të paligjshëm të atyre që i konsideronin kundërshtarë”.