Për shkak të datave të caktuara për festivalin Sunny Hill, Komuna e Prishtinës ka vendosur që rruga “Shpëtim Robaj” në Gërmi të bllokohet për të gjitha mjetet me veprim motorik.
Siç ka njoftuar kjo komunë, kjo rrugë do të jetë e bllokuar nga data 4 gusht deri me datën 8 gusht në ora 07:00.
“Miratohet kërkesa për ndalimin e qarkullimit të mjeteve motorike, qytetarëve në rrugën “Dr. Shpëtim Robaj” në Parkun Gërmia nga hyrja te laura deri te rruga për Butovc, me rastin e organizimit të Festivalit “Sunny Hill” nga data 04.08.2022 ora 00:00 deri më 08.08.2022, ora 07:00”, thuhet në njoftimin e Komunës.
Ndërsa, qarkullimi do të lejohet vetëm për mjete që janë të akredituara nga festivali.
“Qarkullimi lejohet vetëm për mjetet të cilat janë: në shërbim dhe të akredituara nga festivali, mjetet emergjentë (Policia, Zjarrfikësit dhe Ndihma e Shpejtë)”.
Ky vendim është ndërmarrë për shkak të sigurisë publike dhe mbarëvajtjes së aktivitetit.
Tutje në njoftimin e Komunës së Prishtinës, thuhet se organizatorët në bashkëpunim dhe koordinim me Policinë e Kosovës do të kujdesen për lëvizjen e qytetarëve dhe mjeteve në pjesën ku është ndaluar qarkullimi.