Cristiano Ronaldo vazhdon ta shkruajë emrin e tij në librat e historisë, ndërsa rekordet janë ato që i vendos ai.
Superylli portugez është bërë lojtari i parë në histori që shënon në pesë Kampionate Botërore radhazi.
37-vjeçari, fillimisht u bë ndër pak futbollistët që kanë luajtur në pesë turne botërore, para se t’i shënonte Ganës nga penalltia në fitoren dramatike prej 3-2.
Meqë ka qenë kryetema sportive këto javë, Ronaldo nuk mund të mos shënonte në ‘Katar 2022’ dhe këtë e ka bërë për një rekord të ri.
E gjitha nisi nga Kampionati Botëror i vitit 2006, për të vazhduar në 2010, 2014, 2018 dhe tashmë në Botërorin e vitit 2022.
Ndryshe, 37-vjeçari tashmë ka paralajmëruar se ky do të jetë turneu i fundit botëror me përfaqësuesen e Portugalisë dhe padyshim që është shumë i veçantë për të.
