Danijela Vujiçiq, shefe e Ekipit Menaxhues për hartimin e draft-statutit të Asociacionit të Komunave me Shumicë Serbe, u tha gazetarëve në Bruksel se në takimin e presidentit të Serbisë, Aleksandar Vuçiq dhe kryeministrit të Kosovës, Albin Kurti, i cili po mbahet nën patronatin e BE-së, ka prezantuar Draft-Statutin e AKS-së.
Siç ka theksuar ajo, prezantimi ka qenë i sikletshëm për shkak të shqetësimeve, siç tha ajo, të shkaktuara nga delegacioni i Kosovës.
Pas takimit trepalësh, Kurti-Borrell-Vuçiq, ku u miratua Deklarata për Personat e Zhdukur, më pas u prezantua Drafti i parë i statutit të AKS-së, i cili u përgatit nga ekipi menaxhues, i cili përbëhet nga katër persona nga komuniteti serb, në krye me deputeten e Kuvendit të Serbisë, Danijela Vujiçiq.
Para gazetarëve në Bruksel, Vujiçiq tha se ishte e pamundur të prezantoheshin të 67 nenet dhe nëntë kapitujt e Statutit në 30 minutat që BE-ja i dha për formatin e bisedimeve të nivelit të lartë.
Megjithatë, Vujiçiq theksoi se ajo dhe kolegia e saj nga Ekipi Menaxhues, Jelena Beloviq, kanë përjetuar siklet, sepse përfaqësuesit e Kosovës – kryeministri Albin Kurti dhe shefi i ekipit negociator, Besnik Bislimi – sipas saj, vazhdimisht hidhnin kunja dhe talleshin.
Ajo ka thënë se “kaosi erdhi” menjëherë pasi kanë hyrë në dhomë kur presidenti Vuçiq u ka thënë: “Ku jeni serbet e mia nga Kosova dhe Metohia serbe”, për çka siç tha ajo, delegacioni i Kosovës ka reaguar ashpër.
“Nëse nuk do të ishte presidenti Vuçiq që ndërhyri për të na mbrojtur, do të ndodhte kaos”, tha Vujiçiq.
Ajo kujtoi gjithashtu se drafti i statutit të AKS-së është hartuar para pesë vitesh, në periudhën prill-gusht 2018 dhe se për atë dokument janë konsultuar kryetarët e të gjitha komunave, akademikët dhe ekspertë nga fusha të ndryshme.
“Më besoni, statuti është i shkëlqyer”, tha mes tjerash ajo.