Zëdhënësi i Partisë Demokratike të Kosovës (PDK), Faton Abdullahu, ka deklaruar se Qeveria Kurti e ka larguar mundësinë e njohjes së Kosovës nga Serbia nëpërmjet “normalizimit të raporteve”.
Ai ka thënë se dialogu i shtruar në Bruksel nga kryeministri Albin Kurti e pamundëson njohjen e Kosovës, duke shtuar se themelimi i këtij lloj Asociacioni të komunave me shumicë serbe nënkupton shkallë e tretë e pushtetit.
“Po flitet për normalizim të raporteve me Serbinë, ndërsa përpara dialogu flitej për njohje. Ku mbeti në dialog njohja e Serbinë për Kosovën shtet? Nuk është njohja. Ka degraduar ky proces e po vazhdon. Asociacioni i tillë, ne kemi thënë se ka defekte, i kemi cekur defektet, po servohet një shkallë e tretë e pushtetit që është brengosëse dhe nuk ekziston në Kushtetutën e Kosovës…Normalizimi në këtë raport nënkupton largimin e njohjes si kërkesë bazike, që i bie ndryshe normalizimi nënkupton të harrohet njohja”, ka thënë Abdullahu të hënën në “60 Minuta” të KTV-së.
Sipas zyrtarit të PDK-së, Qeveria Kurti po prolongon punën dhe secilin vendim para zgjedhjeve, e sipas tij, ky ekzekutiv është dashur të largohet më herët, por “këtë do ta bëjë në shkurt”.