Futbollisti i njohur kroat dhe lojtari i Real Madridit, Luka Modric së shpejti do të bëhet një nga pronarët e klubit anglez Swansea.
Këtë e ka publikuar sot ekskluzivisht gazetari Fabrizio Romano, i cili ka thënë se marrëveshja mes dy palëve tashmë është arritur.
Tani duhet vetëm të respektohet procedura e nevojshme ligjore dhe Modric do të bëhet pronar i një pjese të vogël në pronësinë e Swansea.
Është një klub që sot garon në Championship, niveli i dytë i futbollit anglez, dhe tetë vjet më parë “Mjellmat” ishin në mesin e elitës – në Ligën Premier.
Ditët e fundit është përfolur shumë për statusin e Modric në Real Madrid, ku duket qartë se karriera e tij po i vjen fundi, por Romano pretendon se puna te Swansea nuk reflekton në karrierën e kroatit.
Aktualisht Swansea është në vendin e 12-të në tabelën e Championshipit dhe sigurisht që nuk do të bjerë, por nuk ka asnjë shans për të luftuar për ngjitjen në Ligën Premier.