Të martën në mbrëmje kanë arritur votat e para nga diaspora në Komisionin Qendror të Zgjedhjeve.
Zëdhënësi i KQZ-së, Valmir Elezi, ka thënë se gjatë mbrëmjes së sotme janë sjellë 36.500 pako me fletëvotime të cilat i takojnë procesit të votimit përmes postës nga Gjermania dhe Zvicra.
Elezi ka thënë se sipas procedurave, fillimisht këto pako me fletëvotime i nënshtrohen procesit të vlerësimit, i cili përfshin verifikimin nëse ato u takojnë votuesve të regjistruar dhe nëse janë ndjekur procedurat tjera të parapara, ndërkaq numërimi i këtyre fletëvotimeve do të bëhet në një fazë të mëvonshme në Qendrën e Numërimit dhe Rezultateve, pas ditës së zgjedhjeve.
“Edhe procesi i vlerësimit të dërgesave postare do të mund të vëzhgohet nga vëzhgues të akredituar nga KQZ-ja, të cilët do të njoftohen me kohë”, ka thënë ai.
Sipas tij, aktualisht, është duke u zhvilluar periudha e votimit përmes postës, e cila vlen vetëm për shtetasit që gjatë regjistrimit si votues jashtë Kosovës janë përcaktuar individualisht për mënyrën e votimit (1) duke dërguar fletëvotimin përmes postës në një nga kutitë postare të hapura nga KQZ jashtë Kosovës, apo (2) duke dërguar fletëvotimin përmes postës në kutinë postare të KQZ-së në Kosovë.
Veturat që po bartin votat po shoqërohen nga Policia e Kosovës në drejtim të Prishtinës, përkatësisht selisë së Komisionit Qendror të Zgjedhjeve (KQZ), dhe do të jenë nën vëzhgim nga kamerat e sigurisë.
Periudha e votimi ka filluar më 9 janar dhe do të përfundojë më 8 shkurt 2025.
104.924 votues që janë regjistruar për të votuar jashtë Kosovës.
The post Arrijnë votat e para nga diaspora, përcillen nga Policia dhe do të vëzhgohen nga kamerat e sigurisë appeared first on Sinjali.