Bashkësia Islame e Kosovës çaste më parë e ka lëshuar një komunikatë për media pas skandalit të djeshëm në një shkollë në Komunën e Gjakovës ku nëpërmjet lajmërimit me fotografi, ndalohet prania e nxënëseve të mbuluara.
Në njoftimin e lëshuar të BIK-ut thuhet se ky institucion i lartë i fesë islame në Kosovë e dënon aktin e drejtorisë së shkollës “Nexhmedin Nixha” në Gjakovë, e cila e trajton mbulesën e femrës sipas parimeve islame si një veprim ordiner.
Tutje në komunikatë thuhet se një trajtim i tillë i parimeve fetare është mendësi e së kaluarës moniste. Mësimet e parimet fetare nuk dëmtojnë e nuk rrezikojnë shoqërinë, përkundrazi edukojnë, mësojnë e fisnikërojnë. Ky është qëllimi i besimit, e në këtë kontekst duhet parë edhe mbulesën e femrës myslimane. /Telenews.al/
Komunikata e plotë dhe pa ndërhyrje e BIK-ut:
BASHKËSIA ISLAME E KOSOVËS LËSHON KOMUNIKATË, PAS SKANDALIT NDAJ SHAMISË NË GJAKOVË
Kryesia e Bashkësia Islame të Kosovës dënon aktin e drejtorisë së shkollës “Nexhmedin Nixha” në Gjakovë, e cila e trajton mbulesën e femrës sipas parimeve islame si një veprim ordiner.
Një trajtim i tillë i parimeve fetare është mendësi e së kaluarës moniste. Mësimet e parimet fetare nuk dëmtojnë e nuk rrezikojnë shoqërinë, përkundrazi edukojnë, mësojnë e fisnikërojnë. Ky është qëllimi i besimit, e në këtë kontekst duhet parë edhe mbulesën e femrës myslimane.
Për të mos na u përsëritur situata të tilla, kërkojmë edhe njëherë nga Ministria e Arsimit Shkencës e Teknologjisë, që ta anulojnë nenin 3 paragrafi 1 pika 1.13 të Udhëzimin Administrativ të MASHT-it 06/2014, të cilin e konsiderojmë si burim të këtyre akteve e veprimeve që krijojnë situata të tilla.