Të hënën në Kosovë do të fillojë ushtrimi i madh ushtarak ndërkombëtar “Defender Europe 2025”. Nën udhëheqjen e ushtrisë së Shteteve të Bashkuara të Amerikës, ushtarët e FSK-së bashkë me ushtarë të dhjetëra vendeve të tjera do të kryejnë shumë lloje të trajnimeve ushtarake.
Nga data 26 maj deri më 9 qershor, Kosova do të jetë nikoqire e ushtrimit më të madh ndërkombëtar “Defender Europe 2025”, të drejtuar nga ushtria e Shteteve të Bashkuara të Amerikës.
Përveç SHBA-së dhe Kosovës, në të marrin pjesë edhe Shqipëria, Kroacia, Maqedonia e Veriut dhe Bullgaria.
Në 8 vendet pritëse të këtij ushtrimi, përfshirë Kosovën, do të marrin pjesë rreth 12 mijë ushtarë nga SHBA-ja dhe 19 vende aleate.
Për Kosovën, ky do të jetë një rikthim në këtë ushtrim, meqë në vitin 2023 pavarësisht se ishte nikoqire, u përjashtua për shkak të tensioneve në veri të vendit.
Organizimin e sivjetmë, ish-ushtaraku Afrim Veseli e vlerëson si mirëbesim dhe partneritet mes Kosovës dhe SHBA-së.
Dobia e saj nuk është vetëm në aspektin ushtarak, por mesazhet janë shumëdimensionale, edhe në aspektin politik: që Kosova nuk është vetëm, është me Shtetet e Bashkuara të Amerikës. Është tregues i qartë që SHBA-ja dhe ushtria amerikane kanë besim ndaj ushtrisë së Kosovës për zhvillimin dhe rritjen e kapaciteteve të saj ushtarake”, ka thënë për TV Dukagjinin Afrim Veseli, ish-ushtarak.
Megjithatë, për ushtarët e FSK-së kjo do të jetë një mundësi shumë e mirë për të avancuar dhe rritur njohuritë e tyre, shton Veseli.