Një deputet i Lëvizjes Vetëvendosje në kushte anonimiteti i ka thënë agjencisë ndërkombëtare të lajmeve Reuters se kryeministri Albin Kurti po tenton të hyjë në “pazare” me opozitën.
Teksa ka folur për agjencinë e lajmeve Reuters, ky deputet i VV-së ka thënë se Kurti po provon që të bindë partitë opozitare që t’ia votojnë Kodin Civil duke e dhënë në këmbim dërgimin e vendit në zgjedhje të parakohshme.
“Një deputet i partisë në pushtet i tha në kushte anonimiteti agjencisë Reuters se Kurti po mundohet që ta bindë opozitën për ta votuar kodin e ri civil, si dhe marrëveshjet për energjinë e infrastrukturën, duke i ofruar si këmbim për shpalljen e zgjedhjeve të parakohshme”, raportoi ky medium të mërkurën.
Tutje, në një shkrim të gjatë rreth Projekt-Kodit Civil, Reuters raporton disa deputetë të pushteti janë ende kundër miratimit të Kodit Civil, e mes tyre edhe Duda Balje.
“Ne nuk duam presion nga një komunitet i vogël për të anashkaluar atë që mendon shumica,” i tha ajo Reutersit.
Ndërkaq, Kryeministri Albin Kurti para disa javësh gjatë qëndrimit të tij në Gjermani premtoi se do të bënte përpjekje për të siguruar votat e mjaftueshme për kalimin e Kodit Civil.