Një aksident i rëndë trafiku ka ndodhur pasditen e së dielës në rrugën Komoran–Gllogoc, konkretisht në fshatin Zabel i Ulët, ku një automjet tip Audi me ngjyrë të zezë ka dalë nga rruga duke shkaktuar pasoja të rënda.
Sipas informacioneve që ka mësuar Sinjali, automjetin e drejtonte 30-vjeçarja Marigona Limani nga fshati Cerovik i Klinës, e cila ka mbetur e lënduar. Fatkeqësisht, nga ky aksident ka ndërruar jetë një vajzë e mitur 7-vjeçare me inicialet T. L., ndërsa disa pasagjerë të tjerë kanë pësuar lëndime.
Të lënduarit janë identifikuar si Luljeta Maloku rreth 29-vjeçare, Valbona Maloku, si dhe dy fëmijë të mitur me inicialet K. M. rreth 6-vjeçar dhe K. M. rreth 2-vjeçar, të gjithë nga i njëjti fshat. Ata janë transportuar me urgjencë në QKUK, ku sipas mjekëve gjendja e tyre është jashtë rrezikut për jetë, megjithatë po vazhdojnë trajtimin mjekësor.
Në vendin e ngjarjes kanë dalë njësitë e Policisë së Kosovës dhe hetuesit e trafikut rrugor, të cilët kanë kryer ekzaminimet. Me vendim të Prokurorit të Shtetit, trupi i pajetë i vajzës së mitur është dërguar për obduksion në Institutin e Mjekësisë Ligjore.