Kryetarja e Dhomës së Përfaqësuesve, Nancy Pelosi i ka dhuruar Presidentit të Ukrainës, Volodymyr Zelenskyt, flamurin amerikan që valoi mbi Capitol Hill, gjatë vizitës së tij të mërkurën.
Pasi Zelensky iu drejtua anëtarëve të Kongresit me një fjalim, Pelosi i shtrëngoi dorën Zelenskyt dhe i dhuroi flamurin e SHBA-së.
“Ky flamur u valëvit mbi Kapitol sot për nder të vizitës së presidentit,” njoftoi Pelosi.
Ky është udhëtimi i parë i presidentit Zelenski jashtë vendit që nga fillimi i sulmit rus ndaj Ukrainës më 24 shkurt të këtij viti.
Vizita e Presidentit të Ukrainës Volodymyr Zelenski në Shtetet e Bashkuara vjen në një kohë kur Kongresi amerikan pritet të votojë për buxhetin, i cili do të përfshijë një ndihmë prej 45 miliardë dollarësh për Ukrainën dhe përgatitjeve të Uashingtonit për t’i dhënë Kievit sistemin e avancuar të raketave, ‘Patriot’.
Ndihma e re amerikane, që përfshin edhe sistemin e raketave ‘Patriot’, sinjalizon një zgjerim nga Shtetet e Bashkuara të llojit të armatimeve të avancuara, që do të dërgojnë në Ukrainë për të forcuar mbrojtjen e saj ajrore kundër sulmeve në rritje me raketa nga Rusia në javët e fundit.
Vendimi për dërgimin e sistemit të raketave ‘Patriot’ vjen pavarësisht kërcënimeve nga Ministria e Jashtme e Rusisë se furnizimi i Ukrainës me këtë sistem të avancuar raketash do të konsiderohej një hap provokues.
