Dubai po fiton një tjetër kryevepër arkitekturore: E rrethuar nga uji, kjo ndërtesë do të bëhet një magnet për turistët

Një ndërtesë futuriste mbi ujë, do ta kthejë Dubain në një qendër të re botërore të artit dhe kulturës bashkëkohore

Nga këndvështrimi evropian, shpesh thuhet se Dubai është një destinacion turistik për maksimum shtatë ditë, sepse në këtë qytet të shkretëtirës nuk ka shumë përmbajtje të përshtatshme për të gjithë, veçanërisht për ata që janë të pasionuar pas artit. Megjithatë, kjo pritet të ndryshojë së shpejti, sepse këtu është planifikuar ndërtimi i një Muzeu të Artit. Dhe jo çfarëdo muzeu! Në stilin karakteristik të Dubait, kjo do të jetë një ndërtesë e veçantë, që çdo njeri do të dëshirojë dhe do të mundet – ta vizitojë.

Muzeu i Artit në Dubai, i njohur si DUMA, është projektuar nga fituesi i Çmimit Pritzker, arkitekti Tadao Ando, për konglomeratin Al-Futtaim Group me seli në Dubai, dhe pritet të bëhet një pikë referimi kulturore për artistët dhe dashamirët e artit.

Silhueta e tij mbresëlënëse është e frymëzuar nga deti dhe perlat, dhe do të vendoset mbi një platformë rrethore që shtrihet mbi Dubai Creek. Pamjet e para vizuale që janë publikuar duken mahnitëse, transmeton Telegrafi.

Do të ketë gjithçka

Hapësirat ekspozuese do të vendosen në katin e parë dhe të dytë, të ndriçuara nga një dritare qendrore rrethore në tavan, e projektuar për të hedhur dritë me shkëlqim si i perlës. Një sallon VIP dhe një restorant do të ndodhen në katin e sipërm, ku xhami panoramik do të hapet drejt një tarrace të jashtme të mbuluar, me pamje mbresëlënëse mbi Dubai. Në muze do të ketë gjithashtu bibliotekë, klasa mësimore dhe ambiente për nisma të dedikuara trajnimit të të rinjve krijues.

“Muzeu i Artit në Dubai është më shumë se një atraksion arkitektonik. Ai është një deklaratë kulturore që pasqyron hapjen e Dubait ndaj kreativitetit dhe konfirmon rolin e tij në lidhjen e kulturave dhe promovimin e talenteve nga mbarë bota”, tha për Dezeen.com Omar Al Futtaim, drejtor ekzekutiv i Al-Futtaim Group.

Mes natyrës dhe ujit

Al Futtaim shtoi se është veçanërisht krenar që kompania ia ka besuar projektin arkitektit të famshëm Tadao Ando, arkitektura e të cilit “flet me gjuhën e dritës, heshtjes dhe shpirtit.”

“Në Dubai, vizioni i tij për Muzeun e Artit do të qëndrojë si një dialog i qetë mes natyrës, ujit dhe shpirtit njerëzor, një remek-vepër e përmbajtjes dhe emocioneve, që mishëron hollësinë dhe elegancën e përjetshme, duke përfshirë thellësisht filozofinë e tij krijuese”, tha Al Futtaim.

Qendër globale e krijimtarisë dhe kulturës

Muzeu i Artit në Dubai do të ekspozojë vepra bashkëkohore arti nga artistë të njohur dhe të rinj, ndërsa hapësirat e tij do të shfrytëzohen për biseda me artistë, panele diskutimi, ngjarje arsimore dhe panaire arti.

“Ky muze do të bëhet një fener i ri për qytetin, duke pasuruar skenën artistike të Dubait dhe duke forcuar më tej statusin e tij kulturor global. Dubai është tashmë një destinacion i preferuar për krijuesit nga e gjithë bota, shtëpi e komuniteteve dhe industrive që bashkëpunojnë për të nxitur rritjen e ekonomisë kreative.

Ky objekt i ri kulturor përforcon qëllimin tonë strategjik për ta pozicionuar Dubain si një qendër botërore të krijimtarisë dhe kulturës, duke forcuar rolin e tij në hartën e artit modern”, deklaroi Mohammed bin Rashid Al Maktoum, sundimtari i Dubait.