Në një tendë të improvizuar në kampin e refugjatëve al-Shati, në veri të Rripit të Gazës, 33-vjeçarja Enas Abu Daqqa mban në krahë vajzën e saj të vogël Niveen. Një ventilator gumëzhin vazhdimisht pas saj për të thyer vapën e mëngjesit.
Enas shqetësohet se shëndeti i Niveen mund të përkeqësohet në çdo moment. Ajo është vetëm shtatë muajshe dhe ka lindur gjatë luftës me një vrimë në zemër.
Ndërsa nëna e saj shpjegon se si luftoi për ta mbajtur gjallë mes një sistemi shëndetësor në kolaps në Gaza, Niveen, me sytë e saj të mëdhenj kafe dhe trupin e vogël, qan dhe shqetësohet.
“Lufta ka qenë shumë e vështirë për të. Ajo nuk po shtonte në peshë dhe sëmurej shumë lehtë”, i thotë Enas BBC-së.
E vetmja mundësi e Niveen për të mbijetuar ishte të merrte kujdes urgjent jashtë Gazës. Dhe në fillim të marsit, Jordania e bëri këtë të mundur.
Ndërsa një armëpushim midis Hamasit dhe Izraelit ishte në fuqi, 29 fëmijë të sëmurë nga Gaza, përfshirë Niveen, u evakuuan në Jordani për të marrë trajtim në spitalet e vendit. Nëna dhe motra e saj më e madhe u nxorën me të.
Ata ishin fëmijët e parë të evakuuar në Jordani, pasi Mbreti Abdullah njoftoi planet për të trajtuar 2,000 fëmijë të sëmurë nga Gaza në spitalet atje gjatë një vizite në SHBA muajin e kaluar.
Këto evakuime u koordinuan me autoritetet izraelite të cilat bëjnë kontrolle të të dhënave të prindërve që udhëtonin me fëmijët e tyre.
Mjekët në Jordani kryen me sukses një operacion në zemër të hapur për Niveen, dhe ajo po fillonte të shërohej ngadalë.
Por rreth dy javë pas fillimit të trajtimit të fëmijëve, armëpushimi në Gaza u prish kur Izraeli rifilloi ofensivën e tij kundër Hamasit, dhe lufta u rikthye, me forcë të plotë.
Për javë të tëra, Enas ndoqi lajmet nga dhoma e spitalit të vajzës së saj në Jordani, duke u shqetësuar për sigurinë e burrit të saj dhe fëmijëve të tjerë që ishin ende në Gaza.
Dhe pastaj vonë natën më 12 maj, autoritetet jordaneze i thanë Enas se po e dërgonin atë dhe familjen e saj përsëri në Gaza të nesërmen, pasi thanë se Niveen kishte përfunduar trajtimin e saj. Enas u shokua.
“Ne u larguam ndërsa kishte një armëpushim. Si mund të na kthenin mbrapsht pasi lufta kishte rifilluar”, thotë ajo e frustruar.
Enas tani është ribashkuar me burrin dhe fëmijët e saj në Gaza. Ata thonë se Niveen nuk e përfundoi trajtimin e saj para se të kthehej mbrapsht, dhe shqetësohen se gjendja e saj mund të përkeqësohet.
“Vajza ime është në një gjendje shumë të keqe që mund të çojë në vdekjen e saj. Ajo ka sëmundje të zemrës. Ndonjëherë ajo ngufatet dhe bëhet e kaltër. Nuk mund të vazhdojë të jetojë në një tendë”, thotë Enas.
Më 13 maj, Jordania njoftoi se kishte dërguar 17 fëmijë mbrapsht në Gaza “pasi kishin përfunduar trajtimin e tyre”. Dhe të nesërmen, një grup i ri prej katër fëmijësh të sëmurë u evakuuan nga Gaza në Jordani.
Autoritetet jordaneze i kanë thënë BBC-së se të gjithë fëmijët e kthyer ishin në gjendje të mirë mjekësore, duke hedhur poshtë pretendimet se ata nuk e kishin përfunduar trajtimin e tyre.
Autoritetet vunë re se mbretëria ishte e qartë që nga fillimi për qëllimin e saj për t’i kthyer fëmijët mbrapsht sapo të ishin më mirë, duke shtuar se kjo ishte e nevojshme “për arsye logjistike dhe politike”.
“Politika e Jordanisë është t’i mbajë palestinezët në tokën e tyre dhe të mos kontribuojë në zhvendosjen e tyre jashtë territorit të tyre”, thuhej në një deklaratë të ministrisë së Jashtme dërguar BBC-së.
Kthimi i 17 fëmijëve do të lejonte gjithashtu që më shumë fëmijë të sëmurë të evakuoheshin nga Gaza, shtoi ajo.
Por një zyrtar në ministrinë e Shëndetësisë të drejtuar nga Hamasi në Gaza, i tha BBC-së se fëmijët ende kishin nevojë për kujdes dhe se kthimi i tyre në luftë rrezikonte jetën e tyre.