Emisari i Bashkimit Evropian për dialogun Kosovë – Serbi, Peter Sorensen, ka zhvilluar të hënën një takim në Bruksel me zëvendëskryeministrin dhe kryenegociatorin e Kosovës, Besnik Bislimi, shkruan Gazeta Sinjali.
Në fokus të diskutimit ishin një sërë çështjesh të rëndësishme që lidhen me procesin e normalizimit të marrëdhënieve mes Kosovës dhe Serbisë. Sorensen bëri të ditur se së shpejti planifikohet organizimi i një takimi trepalësh.
“Prita kryenegociatorin e Kosovës, Besnik Bislimi, në një takim në përgatitje të një takimi trepalësh në dialog sot në Bruksel. Diskutuam për një gamë të gjerë çështjesh të rëndësishme për normalizimin e marrëdhënieve me Serbinë. Planifikojmë të organizojmë së shpejti një takim trepalësh”, shkroi Sorensen në platformën “X”.
Ndërkohë, Bislimi tha në një prononcim për media se ndonëse ishte paraparë një takim trepalësh, ai nuk u zhvillua për shkak të problemeve logjistike me delegacionin serb.
“Ka qenë i paraparë edhe një trilateral, por ky nuk ka mundur të ndodhë për shkak se kanë ndodh komplikime me ekipin e Serbisë, i cili nuk ka arrit në Bruksel për shkak të vonesave në Vjenë apo diçka të ngjashme”, tha ai.
Komandanti i misionit të udhëhequr nga NATO, KFOR, gjeneralmajor Enrico Barduani, priti sot Shkëlqesinë e Tij Hiroyasu Tanigaki, i Ngarkuar me Punë ad interim i Ambasadës së Japonisë 🇯🇵 në Kosovë.
Takimi, i pari ndërmjet komandantit të KFOR-it dhe diplomatit japonez, ofroi një mundësi të vlefshme për të shkëmbyer mendime mbi situatën aktuale në Kosovë. Shkëlqesia e Tij Tanigaki theksoi rolin kyç të KFOR-it në sigurimin e stabilitetit dhe paqes në të gjithë rajonin.
Gjeneral Barduani rikonfirmoi përkushtimin e palëkundur të KFOR-it për të mbështetur të gjitha përpjekjet e Bashkësisë Ndërkombëtare në kontributin për paqen dhe sigurinë afatgjate në Kosovë, si dhe në promovimin e stabilitetit rajonal.
KFOR vazhdon të zbatojë mandatin e tij – të bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe për të garantuar lirinë e lëvizjes, në çdo kohë dhe në mënyrë të paanshme. KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), sipas roleve të tyre përkatëse si reagues të sigurisë.