Ministri i Brendshëm i Gjermanisë, Alexander Dobrindt, ka vlerësuar si shumë të suksesshme kontrollet e ashpërsuara kufitare, duke theksuar se që nga 8 maji 2025, janë kthyer mbi 10.000 migrantë ilegalë, përfshirë rreth 550 persona që synonin të kërkonin azil.
Në një deklaratë për revistën “Stern”, ai e quajti këtë politikë “masë me efikasitet të lartë” në luftën kundër migracionit ilegal. Dobrindt, që mori postin në maj, udhëzoi që të kthehen edhe azilkërkuesit në kufi dhe të forcohen kontrollet ekzistuese. Këto kontrolle kishin filluar fillimisht nga qeveria e kaluar në shtator 2024, nën drejtimin e ish-ministres Nancy Faeser, raporton DW.
Sipas ministrit, që nga vendosja e këtyre masave janë kthyer mbi 30.000 persona dhe numri i migrantëve ilegalë është përgjysmuar. “Në krahasim europian, ne nuk jemi më në krye, por renditemi në vendin e tretë si një destinacion për migracionin ilegal”, tha Dobrindt.
Rezerva ligjore ndaj kthimeve
Megjithatë, jo të gjithë janë dakord me ligjshmërinë e masave të ndërmarra. Një gjykatë administrative në Berlin vendosi se kthimi i disa refugjatëve ishte në kundërshtim me ligjin, duke u mbështetur në Marrëveshjen e Dublinit që përcakton se vendi i parë ku hyjnë refugjatët në BE është përgjegjës për azilin e tyre.
Ministri Dobrindt e konsideroi këtë një rast të veçuar, duke thënë se: “Politika duhet të bëjë dallimin”, dhe theksoi se po vepron brenda kuadrit të së drejtës europiane dhe gjermane.
Kosto dhe kritika nga opozita
Kundërshtime për kontrollet kufitare po vijnë nga E Majta dhe ekologjistët, të cilët i cilësojnë joproporcionale. Sipas të dhënave, nga shtatori 2024 deri në qershor 2025, kostoja shtesë për policinë federale ka tejkaluar 80 milionë euro, kryesisht për orë shtesë pune.
Edhe sindikata e policisë ka shprehur shqetësim për efikasitetin dhe qëndrueshmërinë e këtij angazhimi në raport me rezultatet konkrete.