Agjencia Kombëtare e Krimeve të Mbretërisë së Bashkuar (NCA) ka bërë me dije se karteli kishte qëndruar në një pozicion avantazhues duke furnizuar bandat e krimit në Mbretërinë e Bashkuar për dy dekada.
Policia ka arritur të zbulojë shkallën në të cilën karteli irlandez Kinahan ka përmbytur rrugët e Mbretërisë së Bashkuar me drogë dhe armë.
Agjencia Kombëtare e Krimeve të Mbretërisë së Bashkuar (NCA) ka bërë me dije se karteli kishte qëndruar në një pozicion avantazhues duke furnizuar bandat e krimit në Mbretërinë e Bashkuar për dy dekada.
Policia irlandeze ka vlerësuar gjithashtu se shumica e drogës që Kinahan-ët kanë dërguar nga kontinenti i Evropës kanë qenë të destinuara për në Mbretërinë e Bashkuar.
Vlerësime të tilla do ta bëjnë kartelin – që besohet të jetë me vlerë 1 miliardë euro – një nga furnizuesit më të mëdhenj të drogës në Mbretërinë e Bashkuar.
Megjithatë, një avokat i Kinahan-ëve ka thënë se “thashethemet” dhe “teoritë” rreth tyre nuk janë testuar në gjykatë.
Zbulimet janë bërë në një seri të re dokumentare me katër pjesë të BBC-së në Irlandën e Veriut për familjen e krimit.
I titulluar “Kinahan: The True Story of Ireland’s Mafia”, dokumentari gjurmon kartelin që nga fillimet e tij si një operacion i vogël i tregtisë në rrugë në Dublinin e viteve 1980 deri në reputacionin e tij si një nga organizatat kriminale më të frikshme dhe më famëkeqe në botë.
Vitet e fundit, zbatimi i ligjit ka sugjeruar se një i ashtuquajtur super-kartel që përfshin Kinahan-ët dhe disa nga organizatat e tjera kriminale më të mëdha evropiane, ka kontrolluar një të tretën e tregut evropian të kokainës.
Në vitin 2022, Shtetet e Bashkuara ofruan një shpërblim prej 5 milionë dollarësh për informacion në lidhje me secilin prej drejtuesve të supozuar të kartelit Kinahan: Christy Kinahan Senior dhe djemtë e tij Daniel Kinahan dhe Christy Kinahan Junior.
Ambasadorja e atëhershme e SHBA-ve në Irlandë Claire Cronin ka thënë se “organizata kriminale transnacionale Kinahan është akuzuar për një gamë të gjerë krimesh të tmerrshme, në mbarë botën, duke përfshirë vrasjen, trafikimin e armëve të zjarrit dhe lëndëve narkotike”.
Kinahan-ët u bënë të njohur ndërkombëtarisht pasi një grindje bandash shpërtheu në Irlandë në vitin 2016 dhe 18 njerëz u vranë – 16 u qëlluan për vdekje nga karteli.
Në serinë e dokumentarëve, policia e Mbretërisë së Bashkuar dhe An Garda Síochána (policia irlandeze) – duke përfshirë oficerë të fshehtë – flasin ekskluzivisht për kërcënimin e paraqitur nga organizata Kinahan.
Me ndihmën e regjistrimeve sekrete dhe pamjeve të vëzhgimit të policisë, ka zbulime të reja rreth operacioneve të ndërmarra për të çmontuar strukturën e kartelit në Mbretërinë e Bashkuar dhe Irlandë.
Në veçanti, NCA kishte në shënjestër krahun në Mbretërinë e Bashkuar të kartelit Kinahan – me qendër në qytetin Tamworth, jashtë Birminghamit – i cili ishte shtëpia e disa prej anëtarëve më të vjetër të grupit.
Në këtë fazë, familja Kinahan ishte zhvendosur në Dubai. Por në Tamworth, ishte Thomas “Bomber” Kavanagh.
Një hetues i NCA ka thënë se “nëse do të shikonit grupin e krimit të organizuar Kinahan, dhe hierarkinë brenda tij, ne e vlerësuam Thomas Kavanagh si shumë të lartë; ndoshta një më poshtë Daniel Kinahan, dhe efektivisht CEO-ja evropian i atij rrjeti të trafikut të drogës”.
Për të luftuar kartelin, policia britanike dhe irlandeze besuan se Kavanagh duhej të ndalohej.
Në vitin 2022, Kavanagh u burgos me 21 vjet për importimin e dhjetëra miliona paund droge dhe pastrim parash.
Kreu rajonal i hetimeve të NCA, Ty Surgeon ka thënë se “përafërsisht 20 vitet e fundit, grupi i krimit Kinahan ka qenë në radarin e NCA”.
“Ata janë kontrabandistë droge, ata tregtojnë armë zjarri dhe nuk kam asnjë dyshim në mendjen time se ata furnizojnë shumë grupe të tjera kriminale në Mbretërinë e Bashkuar”.
Mësohet se karteli ka lidhje me bandat në Liverpool, Glasgow, Mançester, Belfast dhe qytete të tjera.
Kreu i Byrosë Kombëtare të Drogës dhe Krimit të Organizuar në Irlandë, Seamus Boland, ka thënë se, për më shumë se një dekadë, “Irlanda përfaqësonte vetëm rreth 25 për qind të biznesit të tyre”.
“Rreth 75 për qind e biznesit të tyre dhe parave të tyre po gjeneroheshin në të vërtetë në Mbretëri të Bashkuar”.
Kjo është hera e parë që policia tregon në procesverbal se sa lojtar i madh ka qenë grupi kriminal Kinahan në vend.
Si rezultat i operacioneve të NCA dhe veçanërisht të forcave irlandeze, më shumë se 80 anëtarë të kartelit janë burgosur, duke përfshirë shumë të ashtuquajtur vrasës me qira.
Kinahan-ët tani operojnë kryesisht jashtë MB-së, si tregtarë me shumicë në tregjet ndërkombëtare të drogave të paligjshme.
Kjo do të thotë se ata do të përfshiheshin në sjelljen e drogës nga Amerika e Jugut në Evropë dhe më pas do t’i transferonin ato drogë në bandat e tjera për t’i shpërndarë, përfshirë në MB.
Teksa agjencitë e zbatimit të ligjit në të gjithë botën kanë emëruar publikisht Kartelin Kinahan, një avokat i Kinahan-ëve vuri në dukje se një “hetim masiv” nga pesë vende përfundoi me një rrëzim të akuzave kryesore kundër tyre.
Marrë nga “BBC”, përshtatur për “Albanian Post”.