Ushtria izraelite ka njoftuar të premten se 107 kamionë me ndihma humanitare janë futur të enjten në Rripin e Gazës. Këto ndihma, të destinuara nga OKB-ja dhe organizata të tjera ndërkombëtare, përfshijnë miell, ushqime dhe ilaçe.
Megjithatë, Kombet e Bashkuara ende nuk e kanë konfirmuar këtë shifër dhe mbetet e paqartë se sa nga kjo ndihmë ka arritur realisht te qytetarët palestinezë.
Ndërkohë, ndihma po fillon të arrijë në disa nga zonat më të prekura dhe të rrezikuara të Gazës, por organizatat humanitare thonë se kjo është larg mjaftueshmërisë për të përballuar krizën që po përjeton mbi 2.1 milionë banorë.
Kushtet humanitare janë përkeqësuar rëndë. Mjekët në Gaza kanë paralajmëruar për përhapje të shpejtë të kequshqyerjes në gjithë territorin.
Përpara luftës, Gaza merrte rreth 500 kamionë ndihma çdo ditë. Por pas vendosjes së një bllokade totale nga Izraeli në fillim të marsit, ndihma është ndërprerë pothuajse tërësisht, duke shkaktuar krizë të thellë.
Organizatat ndërkombëtare e kanë cilësuar këtë bllokadë si ndëshkim kolektiv ndaj popullsisë civile dhe si shkelje të së drejtës ndërkombëtare. Izraeli thotë se masa është vendosur për të rritur presionin mbi Hamasin për lirimin e pengjeve.