Izraeli do të vendosë kufizime shtesë rreth xhamisë al-Aqsa në Jerusalemin Lindor të pushtuar gjatë muajit të shenjtë mysliman të Ramazanit, i cili fillon të shtunën.
Besimtarët që vizitojnë xhaminë nga Bregu Perëndimor i pushtuar do të kufizohen në burra mbi 55 vjeç dhe gra mbi 50 vjeç, raporton Al Jazeera.
Gjithashtu, të burgosurve palestinezë që janë liruar së fundmi nga paraburgimi izraelit do t’u ndalohet vizita në kompleks gjatë Ramazanit.
Izraeli ka pretenduar se masat janë të ngjashme me ato të vendosura vitin e kaluar, por autoritetet palestineze i kanë quajtur ato “raciste dhe provokuese”.
Prania e forcave të sigurisë izraelite rreth Jerusalemit Lindor do të rritet gjatë Ramazanit, me 3000 trupa të armatosura të stacionuara në pikat e kontrollit në rrugët që çojnë drejt xhamisë.
Hebrenjve u lejohet të vizitojnë kompleksin, por jo të luten, në përputhje me një konventë të vjetër.
Në vitet e fundit, ultranacionalistë të krahut të djathtë, përfshirë ish-ministrin e Sigurisë Kombëtare Itamar Ben-Gvir, kanë sfiduar këtë konventë dhe kanë shkaktuar tensione duke vendosur të luten atje./Telenews.al/