Është përcjell me reagime kontrata e nënshkruar nga Telekomi i Kosovës me kompaninë nga Tirana, Digitalb, për të drejtat e transmetimit.
Në përpjekje të pushtetit për të marrë merita për ringjalljen e ndërmarrjeve publike, një përplasje virtuale ka ndodhur mes analistit Imer Mushkolaj dhe deputetit të Lëvizjes Vetëvendosje, Halil Thaçi.
Mushkolaj e ka kritikuar ekzaltimin e eksponentëve të pushtetit pas publikimit të marrëveshjes, e cila sipas tij ‘është biznes hesapi’.
“Çfarë ekzaltimi për platformën e Digitalbit në Telekomin e Kosovës – veçanërisht nga eksponentë të pushtetit. Çfarë suksesi i qeverisë🤦♂️ Në vend që të kishte platformë t’fortë t’veten, tash Telekomi do të nënshkruajë kontratë dyvjeçare në vlerë 1.3 milion euro me Digitalbin. Biznis hesapi. Sen tjetër”, ka shkruar Mushkolaj.
Kësaj deklarate i është kundërpërgjigjur deputeti Thaçi.
“Analisti multitasking. I gjithanshëm. I kudo ndodhur. Për çdo temë. Në çdo kohë. Nganjëherë edhe në të njejtën kohë”, shkroi deputeti i pushtetit.
“Halil, ma mirë kqyr punësoje naj kushëri n’KEK, se politika është sport i randë për ty”, ia ktheu Mushkolaj.
Telekomi i Kosovës do ta paguajë muaj për muaj operatorin kabllor nga Shqipëria, DigitAlb, për transmetimin e përmbajtjes së saj televizive bazuar në një marrëveshje të nënshkruar të hënën.
Marrëveshja me kohëzgjatje dy-vjeçare parashihet të kushtojë 1.3 milionë euro.
Sipas njoftimit të Telekomit, përmes kësaj pako, klientëve e Telekomit do t’ju ofrohet qasje në kanalet televizive dhe në në ligat kryesore të futbollit evropian.