Aktorja e njohur hollivudiane Angelina Jolie rikthehet në ekranin e madh me një rol të fuqishëm në dramën “Couture”, që zhvillohet gjatë Javës së Modës në Paris.
Filmi është realizuar nga regjisorja franceze Alice Winocour dhe shënon debutimin e saj në gjuhën angleze.
“Couture” ndjek historinë e tre grave nga botë të ndryshme: Maxine (Jolie), një regjisore amerikane e filmave që përballet me lajmin se ka kancer në gji; Ada (Anyier Anei), një modele nga Sudani i Jugut që përpiqet të gjejë vendin e saj në industrinë e modës; dhe Angele (Ella Rumpf), një grimere franceze me të kaluarën e saj të fshehur. Të tria përballen me ankthin dhe presionin që fshihet prapa dritave të pasarelave.
Në film luajnë gjithashtu Louis Garrel (The Dreamers), Garance Marillier (Grave, Titane) dhe Finnegan Oldfield. Prodhimi është i CG Cinema (Charles Gillibert), ndërsa shpërndarja është siguruar nga Pathe.
“Couture” do të ketë premierën në Festivalin Ndërkombëtar të Filmit në Toronto në shtator dhe pritet të dalë në kinema në muajin tetor.