Kryeministri i Kosovës, Albin Kurti ka njoftuar në Facebook dorëheqjen e ministrit të Mbrojtjes, Armend Mehaj dhe emërimin e Ejup Maqedoncit në vend të tij.
Kurti ka thënë se Mehaj është dorëhequr për arsye familjare, derisa shprehi falënderimet për punën dhe angazhimin e tij në ministri.
I pari i ekzekutivit ka njoftuar se ka emëruar ministër të ri të mbrojtjes, Ejup Maqedoncin me të cilin thotë se ka bashkëpunuar në funksione tjera.
Ky është postimi i plotë:
Sot, me kërkesë të ministrit të mbrojtjes, Armend Mehaj, kam pranuar dorëheqjen e tij. Kërkesa për lirim nga detyra vjen për shkaqe familjare. Ministrin Mehaj e falënderova për punën e pandërprerë, kontributin mbresëlënës, bashkëpunimin e rregullt dhe angazhimin e tij shembullor nga dita e parë e marrjes së detyrës.
Ministër të ri të mbrojtjes emërova Ejup Maqedoncin, me të cilin kemi bashkëpunuar deri më tani në funksione tjera. Ministrit Maqedonci i uroj punë të mbarë në avancimin e mbrojtjes dhe sigurisë, në zhvillimin dhe ndërtimin e ushtrisë sonë.
Me këtë rast zhvilluam një takim të përbashkët edhe me komandantin e Forcës së Sigurisë së Kosovës, Gjenerallejtënant Bashkim Jashari.