Kryeministri Albin Kurti nga mbledhja e Qeverisë i ka bërë thirrje partive opozitare që ta zgjedhin presidentin dhe të shmangen zgjedhjet e reja.
Ai ka thënë se është e pafalshme të shkohet në zgjedhje
“Përpara kemi çështjen e presidentit dhe një marrëveshje politike mes VV-së dhe LDK-së. Para nesh është sfida me qëndrimin e shprehur nga disa deputetë të LDK-së që nuk duan ta zbatojnë marrëveshjen e arritur me mund e përkushtim. Jemi kaq afër zgjidhjes së presidentit saqë do të ishte e pafalshme të shkojmë në zgjedhje serish për të ardhur prapën në të njëjtën pikë”.
“Ju bëj thirrje liderëve politikë, deputetëve le ta zgjidhin çështjen e presidentit. Le t’i japim vendit tonë institucionet në përputhje me vullnetin qytetar dhe le të ecim përpara”, tha ai.
Kurti ka thënë se gjetja e kompromisit politik është e mundur e sjell rezultat, dhe sipas tij dëshmi e kësaj është konstituimi i Kuvendit.