Një ndryshim i ri dhe i papritur nga kompania Meta ka vënë në alarm përdoruesit e rrjeteve sociale në mbarë botën. Teknologjia e re e inteligjencës artificiale, e quajtur “Muse Image”, lejon që fotot dhe videot tuaja të publikuara në Instagram të përdoren automatikisht nga të tjerët për të gjeneruar imazhe të reja përmes AI.
Ky opsion vjen i aktivizuar automatikisht për çdo profil publik, duke ngritur pikëpyetje të mëdha mbi sigurinë dhe privatësinë e të dhënave tona.
Sipas përditësimit të fundit, çdo përdorues në Instagram mund të marrë një foto tuajën nga një profil publik thjesht duke ju bërë “tag” ose duke ju përmendur (@-mention) në një kërkesë (prompt) drejtuar inteligjencës artificiale. Mjeti i AI-së e merr atë imazh dhe krijon diçka krejtësisht të re bazuar në fytyrën apo trupin tuaj. Fatmirësisht, ky rregull nuk aplikohet për llogaritë që janë të vendosura si “Private” dhe as për profilet e përdoruesve që janë nën moshën 18 vjeç.
Për të mbrojtur fotot tuaja nga përdorimi i paautorizuar për qëllime të inteligjencës artificiale, ekziston një mënyrë e thjeshtë për ta çaktivizuar këtë opsion direkt nga aplikacioni juaj:
1. Hapni profilin tuaj në Instagram dhe shtypni tri vijat lart djathtas për të hapur “Settings and activity”.
2. Zbritni poshtë në listë derisa të gjeni seksionin “Sharing and reuse” (Shpërndarja dhe ripërdorimi).
3. Kërkoni për opsionin e ri të titulluar: “Allow people to use your content on Instagram and with AI features on Meta”.
4. Kthejeni në “Turn Off” (çaktivizojeni) butonin për Posts (Postimet) dhe Reels.
Ekspertët e sigurisë kibernetike këshillojnë që ky kontroll të bëhet sa më parë, pasi llogaritë publike mbeten krejtësisht të ekspozuara ndaj manipulimit të imazheve të tyre nëse ky opsion lihet i aktivizuar.