Dy zyrtarët për media të ambasadës së Shteteve të Bashkuara të Amerikës në Prishtinë, Arbnor Haxhibeqiri dhe Katherine Judd kanë takuar gazetarin kosovar dhe kryeredaktorin e “Metro”, Valon Sylën.
Në njoftimin e ambasadës amerikane thuhet se “është gjithmonë kënaqësi të takohesh me gazetar kosovar, të cilët na rikujtojnë të gjithë ne se sa e rëndësishme është liria e shprehjes, një nga të drejtat bazike të të drejtave të njeriut që është e garantuar për të gjithë nga Kushtetuta e Kosovës.#LiriaeMedias”
Gazetari Syla ka qenë cak i një sulmi fizik para pak kohe, pas disa komenteve që ka bërë lidhur me një imam nga Prizreni. Tre personat e dyshuar për sulmin ndaj Sylës janë në paraburgim derisa drejtësia ta thotë fjalën përfundimtare.
Për sulmin ndaj Sylës kanë reaguar organizatat më të mëdha ndërkombëtare që mbrojnë të drejtat e gazetarëve dhe gjithashtu edhe krerë të institucioneve e partive politike në vend. Vetëm presidentja Vjosa Osmani nuk ka reaguar fare, veprim të cilin Syla e ka cilësuar “inatçorllëk”
Syla ka qenë cak i një sulmi fizik edhe në vitin 2020 pas disa diskutimeve e komenteve që kishte bërë lidhur me diasporën.