Real Madridi përjetoi një zhgënjim të madh pasi u eliminua në gjysmëfinale të Kupës së Botës për Klube të FIFA-s, duke pësuar një humbje të rëndë 4-0 nga PSG.
Përpara turneut, “Los Blancos” konsideroheshin favoritë për trofeun, sidomos me një sulm të frikshëm që përfshinte Kylian Mbappe, Vinicius Junior dhe Rodrygo. Me Xabi Alonson që mori drejtimin e skuadrës pas largimit të Carlo Ancelottit, pritshmëritë ishin të larta për një rikthim pas një sezoni pa trofe.
Por ajo që ndodhi ishte më shumë se një humbje – ishte një sinjal alarmi për madrilenët. Humbja me rezultat të thellë nxori në pah mangësitë serioze, veçanërisht në prapavijë, ku gabimet e Antonio Rüdiger dhe Raúl Asencio u kritikuan ashpër.
Megjithatë, Xabi Alonso ka identifikuar mesfushën si problemin më të madh. Pas largimit të treshes legjendare Kroos–Modric–Casemiro, Real Madridi ende nuk ka gjetur një bërthamë të qëndrueshme në këtë repart.
Kjo është arsyeja pse klubi ka kthyer sytë nga Rodri, mesfushori i Manchester Cityt. Spanjolli, i cili më parë luante për Atletico Madridin, është shndërruar në një lider të vërtetë nën drejtimin e Pep Guardiolës dhe shihet si pasardhësi ideal për të udhëhequr mesfushën madrilene.
Sipas “Transfer News Live”, Real Madridi është i gatshëm të ofrojë mbi 100 milionë euro për shërbimet e Rodrit. Megjithatë, Manchester City nuk ka ndërmend të lejojë largimin e “trurit” të skuadrës. Sipas Mundo Deportivo, klubi anglez po përgatit një kontratë të re me kushte të përmirësuara për ta mbajtur spanjollin në “Etihad”.
Nëse Rodri pranon të rinovojë me Cityn, kjo do të ishte një goditje e madhe për shpresat e Real Madridit për të rindërtuar dominimin në mesfushë.