Një aeroplan ushtarak britanik me 300 trupa arriti sot në orët e mbrëmjes në Aeroportin Ndërkombëtar të Prishtinës “Adem Jashari.
Ky kontingjent nga Regjimenti i Royal Yorkshire i Mbretërisë së Bashkuar do të vendoset përkohësisht në Kosovë dhe do të kryejë disa aktivitete stërvitore bashkë me trupa të tjerë të KFOR’it.
Sot gjatë ditës, KFOR’i ka njoftuar se qëllimi i këtyre stërvitjeve është që të testojë procedurat ekzistuese për dislokimin e trupave shtesë dhe integrimin e tyre brenda misionit të KFOR.
Ky ushtrim është planifikuar të zgjasë nga data 18 shtator deri në fund të tetorit.
Misioni paqeruajtës ka thënë se pas përfundimit të stërvitjes, kontingjenti do të kthehet në Mbretërinë e Bashkuar.
“KFOR do të marrë të gjitha masat për të zbutur efektet në trafikun rrugor, të cilat mund të priten si rezultat i lëvizjeve së personelit ushtarak dhe automjeteve para dhe gjatë stërvitjeve”, u tha në njoftimin e KFOR-it.
KFOR’i ka publikuar edhe disa pamje nga momenti i zbarkimit të këtyre trupave, të cilat mund t’i shihni më poshtë:
UK personnel from the Royal Yorkshire Regiment assigned to NATO reserve forces in support to the #NATO-led #KFOR mission have been temporarily deployed to Kosovo, for a routine Operational Rehearsal Training exercise with other KFOR troops. pic.twitter.com/gtTVbqTKOT
— NATO Kosovo Force – KFOR (@NATO_KFOR) September 18, 2024
