Pas tragjedisë në Los Angeles ku humbi shtëpinë e tij në një zjarr, ylli amerikan Spencer Pratt u dha fansave një pasqyrë se si është të jesh krijues i përmbajtjes në TikTok dhe se ai arriti të fitonte një total prej 23 mijë eurosh në vetëm shtatë ditë.
Një javë pasi shtëpia e tij në Pacific Palisades, Kaliforni u dogj në një zjarr, Pratt foli për të ardhurat e tij në rrjete sociale.
“Këtë javë bëra katër mijë euro në TikTok”, i tha Spencer Variety, duke shtuar, “por në TikTok Live, ku njerëzit mund të më dërgojnë para drejtpërdrejt, mendoj se ndoshta 20 mijë euro. Pra, kjo është fenomenale dhe që të ndryshon jetën. Kjo është fuqia e mbështetësve individualë, njerëz që thjesht ju mbështesin dhe qëndrojnë pas jush”.
41-vjeçari më pas vazhdoi: “Dhe është më e fuqishme kur nuk duhet të mbështetesh në reklama ose inteligjencë artificiale dhe algoritme, kur janë thjesht qenie njerëzore të vërteta që thjesht duan të dhurojnë para për ty. Është e mahnitshme”.
Intervista e Spencer u publikua një ditë përpara se TikTok të ndalonte së punuari për rreth 170 milionë përdorues amerikanë për shkak të një ligji që e mbyllte atë për arsye të sigurisë kombëtare.
Megjithatë, Donald Trump tha se do të nënshkruajë një urdhër ekzekutiv që, të paktën për një periudhë të caktuar, do të shpëtojë TikTok nga mbyllja në Amerikë.
Gjithashtu, TikTok ka konfirmuar se ata po rikthejnë shërbimin e tyre në Shtetet e Bashkuara.