Ministri i Jashtëm i Maqedonisë së Veriut, Bujar Osmani, në cilësinë e kryesuesit të OSBE-së, sot është takuar me ministrin e Punëve të Jashtme të Ukrainës, Dmitro Kuleba.
Ai ka shkuar për vizitë në Kiev sot dhe ka thënë se agresioni ushtarak rus është i pajustifikuar dhe krejtësisht në kundërshtim me parimet dhe angazhimet e përbashkëta të OSBE-së.
“Paqja duhet të kthehet. I bëj thirrje Federatës Ruse që të respektojë parimet dhe detyrimet e dakorduara të OSBE-së. Është e vetmja rrugë drejt paqes”.
“OSBE-ja është e gatshme të ofrojë mbështetje me të gjitha kapacitetet e saj, prandaj gjëja më e rëndësishme është që fillimisht të kthehet misioni në Ukrainë. OSBE do të ofrojë paketën e saj të mekanizmave për të ndihmuar Ukrainën, që të rikuperohet nga plagët e luftës”, ka thënë Osmani.