Një mjegull e pazakontë ka mbuluar sot në mesditë vijën bregdetare të Vlorës, duke shkaktuar habi mes pushuesve dhe plazhistëve që po shijonin ditën përvëluese.
Pamjet nga vendi i ngjarjes tregojnë bregun e zhytur në mjegull, nga zona e Lungomares deri në Zvërnec – fenomen që zakonisht nuk haset në kulmin e verës.
Sipas parashikimeve të sinoptikanëve, kjo mjegull është krijuar për shkak të kontrastit mes temperaturave ekstreme, që kanë shënuar deri në 40°C, dhe ndryshimeve të lagështisë në ajër.
Meteorologët sigurojnë se mjegulla është fenomen i përkohshëm dhe pritet të shpërbëhet brenda disa orësh.
Ndërkohë, rrjetet sociale janë mbushur me foto dhe video nga pamja e veçantë e bregdetit të Vlorës, që për disa çaste është kthyer në një peizazh dimëror në zemër të korrikut.