Deputetja e Partisë Demokratike të Kosovës, Ganimete Musliu gjatë seancës së Kuvendit të Kosovës ku po diskutohet projektbuxheti i vitit 2024, tha se komunat që nuk udhëhiqen nga Lëvizja Vetëvendosje, po dënohen nga pushteti përmes buxhetit.
Musliu tha se kjo e bënë të shëmtuar e diskriminues ndarjen buxhetore për vitin 2024.
“Për komunën e Kamenicës e cila qeveriset nga Vetëvendosja, qeveria ka ndarë 2.100.000 euro. Për Komunën e Shtimes ku qeveris ’’çlirimtari’’ i Vetëvendosjes janë ndarë buxhet 2 333 333 euro. Për komunën e Gjilanit që qeveriset nga Vetëvendosja janë ndarë buxhet 6 800 000. Për komunën e Podujevës që po ashtu qeveriset nga Vetëvendosja janë ndarë buxhet 1 875 000 euro”, ka thënë Musliu.
“Pra në të gjitha komunat e lartcekura qe qeverisen nga Vetëvendosja është buxhet milionësh dhe unë personalisht nuk kam asgjë kundër dhe e përshëndes ndarjen e këtij buxheti për të cilin qytetaret kanë nevojë. Mirëpo, këtë ndarje buxhetore e shëmton inati dhe hakmarrja e Albin Kurtit ndaj qytetarëve të atyre komunave që nuk ja besuan pushtetin Vetëvendosjes të cilat janë diskriminuar e po diskriminohen nga Albin Kurti me këtë buxhet”.
“Në komunën e Vushtrrisë ku qeverisë Partia Demokratike e Kosovës janë ndarë vetëm 650 000 euro. Në komunën e Prizrenit ku qeverisë Partia Demokratike e Kosovës janë ndarë vetëm 900 000 euro. Dhe krahasone numrin e popullsisë së Prizrenit me atë të Shtimes apo të Kamenicës. Në komunën e Suharekës ku qeverisë Aleanca për Ardhmërinë e Kosovës janë ndarë vetëm 100 000 euro. Në komunën e Drenasit ku qeverisë Partia Demokratike e Kosovës janë ndarë vetëm 185 000 euro. Në komunën e Lipianit ku qeverisë Lidhja Demokratike e Kosovës janë ndarë vetëm 400 000. Pra asnjëra nga këto komuna nuk e prek shifrën një milionëshe prandaj kjo e bënë të shëmtuar e diskriminues ndarjen buxhetore për vitin 2024”, tha Musliu.