Deputetja e PDK-së, Ganimete Musliu ka thënë se tash radhën për punë e ka shteti ngase sipas saj populli po e jep ndihmën krah çlirimtarëve. “POPULLI PO E BËN PJESËN E VET. TANI ËSHTË RADHA E SHTETIT.
Populli është ngritur në këmbë, brenda dhe jashtë kufijve të Kosovës, duke kundërshtuar vendimin e Gjykatës Speciale përmes protestave dhe zërit të tij qytetar.
Tani është radha e institucioneve dhe e politikës që ta bëjnë punën e tyre.
Indinjata e qytetarëve duhet të kthehet në veprim institucional, juridik dhe diplomatik. Reagimi i Kosovës nuk duhet të mbetet vetëm në protesta e deklarata. Ai duhet të shtrihet fuqishëm në arenën ndërkombëtare.
Kosova duhet të formojë urgjentisht një Këshill në nivel shtetëror për mbrojtjen e vlerave të luftës së UÇK-së dhe të ndajë buxhet të mjaftueshëm, në mënyrë që çdo element i vendimit të Gjykatës Speciale t’i nënshtrohet shqyrtimit më rigoroz të mundshëm në fazën e apelit.
Institucionet e Kosovës duhet të shfrytëzojnë çdo mundësi për të angazhuar këshilltarë ligjorë të nivelit më të lartë dhe avokatë ndërkombëtarë me përvojë e besueshmëri, të aftë për ta paraqitur çështjen në mënyrë profesionale dhe për ta trajtuar atë edhe në kontekstin historik e politik të luftës së Kosovës.
Dëshmitë e dëshmitarëve dhe provat e dokumentuara duhet të shqyrtohen me rigorozitet maksimal, veçanërisht aty ku ngrihen çështje thelbësore lidhur me pretendimet e Prokurorisë dhe bazën mbi të cilën janë mbështetur dënimet ndaj katër ish-drejtuesve të UÇK-së.
Rasti i Gotovinës ofron një mësim të rëndësishëm: një vendim i shkallës së parë në Hagë nuk është domosdoshmërisht fjala e fundit. Ante Gotovina dhe Mladen Markaç u dënuan në shkallën e parë në vitin 2011, ndërsa në vitin 2012 Dhoma e Apelit i shpalli të pafajshëm, duke rrëzuar vendimet dënuese.
Prandaj, ajo që kemi përpara nuk është vetëm një betejë juridike, por edhe një betejë diplomatike dhe institucionale.
Prioriteti i menjëhershëm duhet të jetë ndërtimi i një apeli rigoroz, profesional dhe të argumentuar, që shqyrton gjetjet e Trupit Gjykues lidhur me provat, përgjegjësinë individuale dhe arsyetimin ligjor mbi të cilin janë mbështetur dënimet.
Njëkohësisht, Kosova duhet t’ia paraqesë në mënyrë sistematike komunitetit ndërkombëtar faktet historike të luftës së viteve 1998–1999: fushatën e Serbisë për represion dhe shpërngulje me forcë, masakrat ndaj civilëve dhe abuzimet e dokumentuara nga mekanizmat ndërkombëtarë të drejtësisë, ndërhyrjen e NATO-s dhe rrethanat historike që çuan drejt çlirimit dhe Pavarësisë së Kosovës.
Fusha e betejës tani është edhe diplomacia.
Kosova duhet t’i përgjigjet kësaj sfide me organizim shtetëror, këmbëngulje, disiplinë ligjore dhe angazhim të fuqishëm ndërkombëtar.
Sepse historia e Kosovës nuk mund të lihet në duart e atyre që për më shumë se dy dekada janë përpjekur ta deformojnë atë.
Tani është koha që Kosova ta mbrojë të vërtetën e saj me fakte, me ligj dhe me argumente, kudo ku ajo duhet të dëgjohet.
S’kemi kohë për të humbur”, shkruan Musliu në reagim.