Ministrja e Arsimit, Arbërie Nagavci tha se pamjet e djeshme të nxënësve të komunitetit rom në “Festën e Abetares” janë shqetësuese dhe të papranueshme.
Nagavci në Facebook ka njoftuar se sot ka vizituar shkollën “Xhemajl Kada” në Pejë, për t’u informuar nga afër për rastin e djeshëm të raportuar nga mediat në “Festën e Abetares”, si rast diskriminues për nxënësit e komunitetit rom, ashkali, egjiptian.
Ajo theksoi se janë ndarë 500 bursa për nxënësit e komunitetit rom, ashkali dhe egjiptian.
“Si Ministri e Arsimit kemi ndërmarrë një varg politikash gjithëpërfshirëse. Ndër të tjera, kemi ndarë 500 bursa për nxënësit e komunitetit rom, ashkali dhe egjiptian dhe sivjet për herë të parë do të përkrahim me bursa edhe studentët e këtyre komuniteteve, me synim ata të Fakultetit të Edukimit, në mënyrë që të krijojmë kuadro që do të punojnë në shkollat tona. Është e rëndësishme që këto politika të gjejnë zbatim në të gjitha nivelet dhe në këtë drejtim është po aq i rëndësishëm angazhimi i mësimdhënësve, prindërve, komunitetit dhe mediave e shoqërisë civile”, tha ajo.
Kurse lidhur me rastin e djeshëm Nagavci tha se janë dërguar inspektorë që do të shqyrtojnë në detaje këtë rast.
“Për rastin e e djeshëm, MAShTI ka dërguar inspektorët, të cilët do të shqyrtojnë në detaje informatën, ndërsa nga vizita në shkollë u informova se bëhet fjalë për një klasë të mësimit intenziv, ku ka nxënës të moshave dhe klasave të ndryshme, të cilët janë riatdhesuar ose e kanë braktisur mësimin për arsye të ndryshme”, shtoi tutje ajo.