Një pasagjer që ishte në tren me fëmijët e tij gjatë sulmit masiv me thikë të mbrëmjes së kaluar midis Doncaster dhe Londrës, ka treguar për BBC se si ai dhe fëmijët e tij përjetuan momente paniku dhe pasigurie të plotë ndërsa sulmi u zhvillua disa vagona më tej.
Steve, i cili udhëtonte në vagonin B me dy fëmijët e tij, i tha BBC Radio 4’s Broadcasting House se sulmi ndodhi në vagonin J.
Edhe pse nuk e pa vetë sulmin, ai dëgjoi një njoftim zyrtar në sistemin e adresave publike:
“Jemi në dijeni të incidentit. Ju lutemi qëndroni të sigurt.”
“Ishte e frikshme ta dëgjoje këtë dhe të mos dije se çfarë po ndodhte në të vërtetë. Pjesa më e keqe ishte të ishe në tren, fjalë për fjalë i mbyllur në një kuti dhe pa mundur të dilje”, tha Steve.
Kur treni ndaloi në stacionin Huntingdon, pasagjerët e panikuar filluan të trokisnin në dyer dhe të thërrisnin stafin e platformës për udhëzime.
“Ne po bërtisnim: ‘Çfarë do të bëjmë?’ Nuk dija nëse të zbrisja apo të qëndroja në tren. As stafi nuk dukej se dinte çfarë të thoshte,” tha ai.
Steve tregon se më pas doli me vrap nga stacioni me fëmijët dhe u strehua në një shtëpi aty pranë, ku një çift i moshuar i mbajti derisa ishte e sigurt të largoheshin.
“Fëmijët janë shumë të tronditur, por po përballojnë mirë situatën. Jam jashtëzakonisht mirënjohës që familja ime është shëndoshë e mirë,” tha ai.
Sulmi ndodhi në një tren të London North Eastern Railway që udhëtonte midis Doncaster dhe Londrës. Një burrë i armatosur me thikë filloi të sulmonte rastësisht pasagjerët pasi treni kaloi nëpër Peterborough.
Dhjetë persona u plagosën, dy prej të cilëve janë ende në gjendje kritike.
Policia ka arrestuar dy burra, të moshës 32 dhe 35 vjeç, të dy shtetas britanikë, nën dyshimin për tentativë vrasjeje. Edhe pse njësitë kundër terrorizmit janë gjithashtu të përfshira në hetim, Policia Britanike e Transportit tha se nuk kishte “asgjë që të sugjeronte një motiv terrorist” në këtë kohë.