Kryeministri i Izraelit Benjamin Netanyahu në një konferencë për media ka thënë se “kjo do të jetë një luftë e gjatë dhe e vështirë”, duke shtuar: “Ne do të fitojmë. Ne do të fitojmë”.
Ai e përshkruan luftën, e cila pason sulmet e Hamasit më 7 tetor, si “lufta e dytë e pavarësisë” e Izraelit, raporton BBC.
“Ne do të luftojmë dhe nuk do të dorëzohemi. Nuk do të tërhiqemi mbi tokë dhe nëntokë”.
Netanyahu thotë se ushtarët dhe komandantët izraelitë “janë tani në Rripin e Gazës, ata janë të dislokuar kudo”.
Më herët gjatë ditës së sotme, presidenti i Turqisë, Recep Tayyip Erdogan, akuzoi Izraelin për krime lufte.
Kryeministri izraelit nuk e përmend emrin e tij, por thotë: “Mos na akuzoni për krime lufte. Nëse mendoni se mund t’i akuzoni ushtarët tanë për krime lufte, kjo është hipokrizi. Ne jemi ushtria më e moralshme në botë”.
Ai thotë se ushtria po merr masa paraprake për të mbrojtur civilët dhe akuzon Hamasin për kryerjen e krimeve kundër njerëzimit duke “përdorur njerëzit e tyre si mburoja njerëzore”.
Ministria e shëndetësisë në Gaza thotë se më shumë se 7600 njerëz janë vrarë në Gaza që kur Izraeli filloi bombardimin e territorit. Organizata Botërore e Shëndetësisë tha të premten se 40% e të vdekurve ishin fëmijë.
Hamasi vrau më shumë se 1400 njerëz në Izrael në sulmet e 7 tetorit. Shumica e tyre ishin civilë, duke përfshirë gra dhe fëmijë. /Telenews.al/