Kompania Rajonale e Ujësjellësit “Prishtina” ka njoftuar se punonjësit e mirëmbajtjes në Graçanicë kanë hasur në një pishinë publike duke e mbushur me ujë të pijshëm.
Nga KRU Prishtina kanë paralajmëruar se do të inspektohen të gjitha pishinat, bashkërisht me laborator, duke bërë matjen e sasisë së klorit dhe se do të ketë ndëshkime maksimale për ata që keqpërdorin ujin e pijes.
“Punonjësit e mirëmbajtjes në Graçanicë kanë hasë në një pishinë publike duke e mbushë me ujë të pijshëm. E neveritshme dhe më shumë se shqetësuese. Do të inspektohen të gjitha pishinat, bashkërisht me laborator, duke bërë matjen e sasisë së klorit. Ndëshkim maksimal!”, thuhet në njoftim.
Për nesër, KRU Prishtina ka paralajmëruar aksion te borxhlinjtë e mëdhenj dhe konsumatorët ilegal në Gracanicë.
“Nuk ka ujë të pijshëm pa paguar faturat e ujit, ngase kemi një kosto të lartë të trajtimit të ujit dhe shpërndarjes përmes tubacioneve primare, sekondare e terciare deri te konsumatorët. Nesër 26 korrik 2023, e mërkurë duke filluar nga ora 10:00 do të kemi aksion të madh me disa ekipe të shkyçjes dhe inspektor, me fokus konsumatorët që kanë borxhe tejet të mëdha, në Graçanicë”, thuhet në njoftim.